త్వరలో ‘యుగానికి ఒక్కడు’ సీక్వెల్ షూటింగ్ స్టార్ట్…
హీరో కార్తీ నటించిన హిట్ సినిమాల్లో ‘యుగానికి ఒక్కడు’ ఎంతో స్పెషల్ గా చెప్పవచ్చు. కోలీవుడ్ డైరెక్టర్ సెల్వరాఘవన్ పదేళ్ళ క్రితం తీసిన సినిమా ఇది. ఇప్పుడు ఈ సినిమాకు సీక్వెల్ చేసేందుకు రెడీ అయ్యాడు డైరెక్టర్ సెల్వరాఘవన్. అప్పట్లో తమిళంతో పాటు తెలుగులో కూడా ఈ సినిమా మంచి టాక్ తో నడిచింది.
అయితే ప్రయోగాత్మక సినిమాగా కూడా ఇది మంచి పేరు తెచ్చుకుంది. చోళ, పాండ్య రాజుల ఇతివృత్తంతో ఆసక్తికరమైన ట్విస్ట్ లతో తీసిన అడ్వెంచర్ మూవీ కావడం విశేషం. అలాగే ‘7జి బృందావన కాలనీ, ఆడువారి మాటలకు అర్థాలే వేరులే’ తర్వాత సెల్వరాఘవన్ తీసిన సినిమా కావటంతో అటు తమిళులను, ఇటు తెలుగువారిని బాగా అలరించింది. కాగా ఇప్పుడు ఈ సినిమా సీక్వెల్ ను ధనుష్ తో తీయబోతున్నాడు సెల్వరాఘవన్. కార్తీ కూడా అతిధి పాత్రలో నటించబోతున్నాడు. సీక్వెల్ ట్రెండ్ బాగా పెరగిన ఈ తరుణంలో ‘యుగానికి ఒక్కడు’ సీక్వెల్ పై కూడా అందరూ ఆసక్తిని పెంచుకుంటున్నారు. ప్రస్తుతం ప్రీ ప్రొడక్షన్ వర్క్ జరుపుకుంటున్నట్లు తెలుస్తోంది. అలాగే ఇప్పటికే స్క్రిప్ట్ వర్క్ పూర్తి చేసిన సెల్వరాఘవన్ షూటింగ్ కి కూడా సన్నాహాలు చేస్తున్నట్లు తెలుస్తోంది. కాగా అన్ని అనుకూలిస్తే… 2024లో ఈ సినిమాను ప్రేక్షకుల ముందుకు తేనున్నట్లు తెలుస్తోంది.