రివ్యూ: ఆదిపురుష్

”ఆగ‌మ‌నం.. ఆధ‌ర్మ విధ్వంసం..” అంటూ ఆదిపురుష్ ప్ర‌పంచ‌వ్యాప్తంగా థియేట‌ర్‌ల‌లోకి వ‌చ్చేశాడు.
రాముడి పాత్రలో ప్రభాస్, సీత పాత్రలో కృతి సనన్, రావణాసురుడి పాత్రలో సైఫ్ అలీ ఖాన్ నటించిన ఈ సినిమా ఎలా ఉంది? భారీ అంచనాల మధ్య విడుదలైన ఈ సినిమా అంచనాలను అందుకుందా? ఇవాల్టీ రివ్యూ రిపోర్టులో తెలుసుకుందాం.

క‌థ‌:
వాల్మీకి రామాయణం ఆధారంగా శ్రీరాముడి జీవిత కథను తెరకెక్కించారు. సీతారామ (ప్రభాస్, కృతిసనన్), లక్ష్మణులు వనవాసం చేస్తున్న సమయంలో శ్రీరాముడిని చూసి శూర్పణఖ మనసు పడుతుంది. అయితే తాను వివాహితుడినని శ్రీరాముడు శూర్పణఖ కోరికను తిరస్కరిస్తాడు. దాంతో సీతపై హత్యా ప్రయత్నం చేయబోయిన శూర్ఫణఖ ముక్కును కోసేస్తాడు. తన చెల్లిలికి జరిగిన అవమానాన్ని తట్టుకోలేక రావణుడు సీతను అపహరిస్తాడు. లంకలో బంధించి త‌న‌తో పెళ్లాడమని వేధిస్తుంటాడు. సీతా అపహరణ తర్వాత రాముడు ఎలాంటి వేదనకు గురయ్యాడు? సీత ఆచూకీ తెలుసుకోవడానికి ఎలా ప్రయత్నించాడు? సీత ఆచూకీని వానరులు చెప్పిన తర్వాత లంక ప్రయాణం ఎలా సాగింది. లంకను చేరుకోవడానికి రామసేతు నిర్మాణం జరిగింది? శ్రీరాముడు, వానర సైన్యంపై రావణసురుడు, ఇంద్రజిత్, కుంభకర్ణుడు ఎలా మాయలు చేసి ముప్పు తిప్పలు పెట్టారు. రావణ సంహారం ఎలా జరిగిందనే ప్రశ్నలకు సమాధానమే ఆదిపురుష్ సినిమా కథ.

రావణసురుడు అమరత్వం కోసం తపస్సు చేసే ఎపిసోడ్‌తో కథ మొదలవుతుంది. రావణసుర క్యారెక్టర్‌ను పవర్‌పుల్‌గా చూపించి కథపై ఆసక్తిని రేపడంలో ఓం రావత్ స‌ఫ‌ల‌మ‌య్యాడ‌నే చెప్పాలి. సీతను రావణసురుడు అపహరించడంతో అసలు కథ మొదలువుతుంది. తొలి భాగంలో సీతా అపహరణ సమయంలో జాటయువుతో ఫైట్, ఆ ఎసిసోడ్‌లో గ్రాఫిక్ వర్క్ ఆకట్టుకొనేలా ఉంటుంది. వాలి, సుగ్రీవ మధ్య ఫైట్, రామసేతు నిర్మాణ ఎపిసోడ్ ఇంట్రెస్టింగ్ ఎలిమెంట్స్‌గా కనపడుతాయి. దర్శకుడు సినిమాను టెక్నికల్‌గా నెక్ట్స్ లెవ‌ల్‌లో చేశాడనే చెప్పాలి. కాకపోతే కథలో ఎక్సైట్‌మెంట్ లేకపోవడం కొంత నిరాశగా ఉంటుంది. కొన్ని సీన్ల‌ను కొంత భిన్నంగా తీసే ప్ర‌య‌త్నం చేశాడు. ఇలా చేసిన సీన్లు ప్రేక్ష‌కుల‌కు న‌చ్చ‌వు.

ఇక సెకండాఫ్‌లో రామసేతు నిర్మాణం సమయంలో సముద్రుడు, రాముడు మధ్య నడిచే సీన్ గ్రాఫిక్ వర్క్ కొత్త అనుభూతిని కలిగిస్తుంది. సంజీవని పర్వతాన్ని అంజనేయుడు తీసుకు రావడం, అలాగే ఇంద్రజిత్తు, కుంభకర్ణుడితో పోరాటాలు బాగా చిత్రీకరించారు. రాముడు – రావణుడు తొలిసారి కలుసుకొనే స‌న్నివేశం కొత్తగా, ఆస‌క్తిగా ఉంటుంది. టెక్నికల్‌గా సినిమాను డీల్ చేసే క్రమంలో కథపరంగా జాగ్రత్తలు తీసుకోవడంలో తడబాటు కనిపించింది. కథ కంటే టెక్నికల్ అంశాలే డామినేట్ చేశాయనిపిస్తుంది. ఓవరాల్‌గా కథలో ఎమోషన్స్, ఎక్సైట్‌మెంట్ పెద్దగా కనిపించవు.

న‌టీన‌టుల ప్ర‌తిభ:
శ్రీరాముడిగా కొత్త లుక్‌లో ప్రభాస్ కనిపించారు. అయితే మనకు రాముడంటే నీలమేఘశ్యాం అనే మనసులో ముద్ర పడింది. శ్రీరాముడిని బాడీ కలర్ నీలంలో లేకపోవడంతో కొంత కనెక్ట్ కావడానికి ఇబ్బందిగా అనిపిస్తుంది. పైగా ప్ర‌భాస్‌కు మీసాలు కూడా ఉంటాయి. శ్రీరాముడి పాత్ర‌లో ప్రభాస్ తెర మీద అద్బుతంగా కనిపించాడు. సీతగా కృతిసనన్‌కు పెద్దగా ఫెర్ఫార్మెన్స్ చేయడానికి స్కోప్ లేకపోయింది. ఇక ఈ సినిమాలో పూర్తిగా డామినేట్ చేసినది రావణుడిగా సైఫ్ ఆలీఖాన్ అని చెప్పుకోవాల్సిందే. లంకేశ్వరుడిగా సైఫ్ నటన బాగుంది. అతడి ఆహార్యం, హావభావాలు కొత్తగా ఉన్నాయి. మండోదరిగా సొనాల్ చౌహాన్, శూర్పణఖగా తృప్తి తొడర్‌మల్, హనుమంతుడిగా దేవదత్త నాగే, లక్ష్మణుడిగా సన్నీసింగ్ ఫర్వాలేదనిపించారు.

టెక్నిక‌ల్ టీమ్ ప‌నితీరు:
ఆదిపురుష్ సినిమాకు మొత్తంగా ప్రాణం పోసింది గ్రాఫిక్స్ ఆండ్ మ్యూజిక్. అజయ్ అతులు అందించిన పాటలు మ‌న‌సుదోచుకుంటాయి. ఇక బ్యాక్ గ్రౌండ్ స్కోర్ సినిమాకు అత్యంత బలమైన అంశంగా మారిందని చెప్పవచ్చు. సినిమాను ఓ రేంజ్‌లో నిలబెట్టడంలో బీజీఎం వర్క్ చాలా బాగుంది. ఇక VFX గ్రాఫిక్స్ హాలీవుడ్ రేంజ్‌లో ఉన్నాయని చెప్పవచ్చు. ఇటీవల కాలంలో 3D ఫార్మాట్‌‌కు సంబంధించి బెస్ట్ గ్రాఫిక్ వర్క్ జరిగిన సినిమాగా ఆదిపురుష్‌ను చెప్పుకోవచ్చు. చాలా చోట్ల 3D ఎఫెక్ట్స్ థ్రిల్లింగ్‌ను కలిగిస్తాయి. సినిమాటోగ్రఫి విజువల్ ఫీస్ట్‌గా అనిపిస్తుంది. సెకండాఫ్‌లో కొన్ని చోట్ల గ్రాఫిక్ వర్క్ నాసిరకంగా అనిపిస్తుంది. ఆర్ట్ విభాగం (VFX) పనితీరు స్పెషల్ ఎట్రాక్షన్‌ అని చెప్పవచ్చు.

యుద్ధ సీన్లు, డైలాగులు బాహుబలిని గుర్తు చేస్తాయి. ‘బాహుబలి’ యుద్ధాన్ని కొత్తగా చూసినట్టు ఉంటుంది. రాముడు బాణం విసిరే స్టైల్, ఆ సీన్స్ ఆకట్టుకుంటాయి. రామాయణం ఆధారంగా వచ్చిన సినిమాలు చూసి ఓ అంచనాతో థియేటర్లలోకి వెళ్లిన ప్రేక్షకులకు సినిమా ప్రారంభం నుంచి ఓం రౌత్ సర్‌ప్రైజ్ ఇస్తూనే వుంటాడు. కాస్త భిన్నంగా చూపించే ప్ర‌య‌త్నం చేశాడు. ఇక‌ ‘వానర సైన్యం చూస్తే ప్లానెట్ ఆఫ్ ది ఏప్స్’లో వానరాలు గుర్తుకు వస్తాయి. లంకలో రావణుడి సైన్యం చూస్తే హాలీవుడ్ సినిమాల్లో క్యారెక్టర్లు చూసినట్టు ఉంటాయి. హనుమాన్ సీన్లు మెప్పిస్తాయి.

అయితే కథపై కంటే టెక్నికల్‌ అంశాలపైనే దృష్టిపెట్టడం అసంతృప్తిని కలిగిస్తుంది. చాలాచోట్ల‌ ఎమోష‌న్స్ పెంచాల్సింది. ఇక కొన్ని సీన్లు పెద్ద‌గా ఉంటూ బోర్ కొట్టిస్తాయి. త‌గ్గించాల్సింది. అయితే రామాయణాన్ని క్రియేటివ్ లిబర్టిని వాడుకొని నేటి తరం ప్రేక్షకులకు కనెక్ట్ అయ్యేలా మోడర్న్‌గా, టెక్నికల్‌గా చెప్పిన ప్రయత్నం అనిపిస్తుంది. పెద్దలకు రామాయణం రకరకాల చూసిన అనుభూతి ఉంది. కాబట్టి వారికి ఈ సినిమా పెద్దగా ఇంప్రెస్ చేయలేకపోవచ్చు. కానీ పిల్లలను ఆలరించే అంశాలు ఎక్కువగానే ఉన్నాయి. కథకు సంబంధించిన ఎమోషనల్, ఎక్సైట్‌మెంట్ కంటే టెక్నికల్‌గా ఈ సినిమా బాగా ఇంప్రెస్ చేస్తుంది. కాబట్టి అంచనాలు లేకుండా వెళ్లితే మంచి అనుభూతిని పంచే సినిమా ఆదిపురుష్.

Leave a Reply

Your email address will not be published. Required fields are marked *