ఆదిపురుష్ ఆగిందా….?
టాలీవుడ్ యంగ్ రెబల్ స్టార్ ప్రభాస్ నటిస్తున్న భారీ పాన్ ఇండియన్ మూవీ ‘ఆదిపురుష్’. ఈ సినిమా షూటింగ్ ఆగిపోయినట్లు సమాచారం అందుతుంది. మహారాష్ట్రలో కోవిడ్ -19 కేసులు విపరీతంగా పెరుగుతుండటంతో సినిమాలు, టీవీ సీరియల్స్ షూటింగ్స్ ను నిలిపివేస్తున్నట్లు రాష్ట్ర ప్రభుత్వం కీలక నిర్ణయం తీసుకుంది. ఈరోజు నుంచి అన్ని పబ్లిక్, ప్రైవేట్ ఇంస్టిట్యూషన్స్, ప్రేయర్ హాల్స్, థియేటర్స్, పార్క్స్, జిమ్ లు మే 1వరకు బంద్ చేయాల్సిందిగా ఆదేశించింది మహారాష్ట్ర ప్రభుత్వం.
అయితే తాజా మార్గదర్శకాలు బుధవారం రాత్రి 8 గంటల నుండి మే1తేదీన ఉదయం 7 గంటల వరకు రాష్ట్రవ్యాప్తంగా అమలు చేయనున్నారు. ఈ ఆదేశాలతో ముంబైలో జరుగుతున్న ‘ఆదిపురుష్’ షూటింగ్ ను నిలిపివేయడం తప్ప వేరే మార్గం లేనట్లు సమాచారం. కాగా ఈ సినిమా కోసం ‘ఆదిపురుష్’ బృందం సరికొత్త సాంకేతిక పరిజ్ఞానాన్ని ఉపయోగిస్తోంది. బ్లూ-మాట్ / గ్రీన్-మాట్ సెట్ వాతావరణంలో ఎక్కువ షూట్ జరుపుకోనున్నట్లు ఇప్పటికే తెలిసింది. బాలీవుడ్ డైరెక్టర్ ఓం రౌత్ దర్శకత్వంలో ప్రభాస్ హీరోగా ‘ఆదిపురుష్’ రూపొందుతున్న విషయం విదితమే.
కాగా ‘ఆదిపురుష్’ సినిమా రామాయణం ఆధారంగా రూపొందించబడుతోంది. ప్రభాస్ రాముడిగా నటిస్తుండగా, సీతగా కృతి సనన్ నటించబోతోంది. లక్ష్మణుడిగా సన్నీ సింగ్, రావణుడి పాత్రలో బాలీవుడ్ హీరో సైఫ్ అలీ ఖాన్ కనిపించబోతున్నారు. తెలుగు, తమిళ, హిందీ, మలయాళ, కన్నడ ఐదు భాషల్లో రూపొందనున్న ఈ సినిమాని టీ సిరీస్ బ్యానర్పై ఎంతో ప్రతిష్టాత్మకంగా భూషణ్ కుమార్, కృష్ణ కుమార్, ప్రసాద్ సుతార్, రాజేష్ నాయర్లు సంయుక్తంగా నిర్మిస్తున్నారు. సుమారు 400 కోట్ల రూపాయల భారీ బడ్జెట్తో నిర్మిస్తున్న ఈ సినిమా 2022 ఆగస్టు 11 వ తేదీన విడుదల కానుంది.