ప్రముఖ నటుడి పై లైంగిక వేధింపుల కేసు

బాలీవుడ్ ప్రముఖ నటుడు మధుర్ మిట్టల్ పై ముంబై పోలీసులు కేసు నమోదు చేశారు. మాజీ ప్రియురాలిపై మోజు పెంచుకొని లైంగిక వేధింపులకు పాల్పడటంతోపాటుగా ఆమెపై దాడి చేసి గాయపర్చినందుకుగానూ అతడిపై ఈ కేసు నమోదైనట్లు తెలుస్తోంది. పోలీసులు వెల్లడించిన విషయాలను బట్టి చూస్తే.. ఫిబ్రవరి 13న మిట్టల్ అతడి మాజీ ప్రియురాలి ఇంట్లోకి చొరబడి తీవ్రంగా దూషించడం జరిగిందని, ఆమెను లైంగికంగా వేధించడంతో పాటు దాడికి కూడా దిగాడని పోలీసులు తెలిపారు. అయితే తాజాగా బాదితురాలి ఇచ్చిన ఫిర్యాదుతో కేసు నమోదు చేసుకొని పోలీసులు దర్యాప్తు చేస్తున్నట్లు వివరించారు.
అయితే ఆ ఘటన సమయంలో నిందితుడు ఫుల్ గా మద్యం సేవించి అదే మైకంలో బాధితురాలి మీద లైంగిక దాడికి పాల్పడ్డాడని ఆమె తరపు న్యాయవాది వెల్లడించారు. అలాగే.. అతడు బాధితురాలిని 15 సార్లు గొంతు పిసికి, ఆమె జుట్టు పట్టుకుని లాగడమే కాకుండా కుడికన్ను మీద పిడిగుద్దులు గుద్దాడని కూడా స్పష్టం చేశారు. కాగా ఈ ఘటన జరగడానికి రెండు రోజుల ముందే వీళ్లిద్దరూ విడిపోయారని కూడా లాయర్ వెల్లడించారు. ఫిబ్రవరి 15న కూడా మరోసారి ఆమె ఇంట్లోకి చొరబడేందుకు ప్రయత్నించాడని, కానీ తానే స్వయంగా మిట్టల్ను అడ్డుకున్నట్లు వివరించారు. కాగా మధుర్ మిట్టల్ ‘షకలక బూమ్ బూమ్’ అనే టీవీ షోలో బాలనటుడిగా పరిచయమై ఆ తర్వాత ‘స్లమ్డాగ్ మిలియనీర్’లో అద్భుత నటన ప్రదర్శించి మంచి గుర్తింపు తెచ్చుకున్నాడు. అంతేకాకుండా మిలియన్ డాలర్ ఆర్మ్, మాత్ర్ సినిమాల్లోనూ ఆయన నటించాడు. ప్రస్తుతం అతడు వెబ్ సిరీస్ షూటింగ్ నిమిత్తం జైపూర్లో ఉన్నట్లు సమాచారం అందుతుంది. మరి దర్యాప్తులో ఎలాంటి నిజాలు బయటకు వస్తాయనేది వేచి చూడాలి.