మెరిసే స్టెప్పులతో అదరగొట్టిన సాయిపల్లవి, చైయ్
టాలీవుడ్ లో మోస్ట్ పవర్ ఫుల్ లవ్ సినిమాగా వస్తున్న చిత్రం లవ్ స్టోరీ. నాగచైతన్య, సాయిపల్లవి తొలిసారి జోడీకట్టిన సినిమా ఇది. శేఖర్ కమ్ముల దర్శకత్వంలో తెరకెక్కుతున్న ఈ సినిమాలోని ‘ఏవేవో కలలే’ గీతాన్ని సూపర్ స్టార్ మహేశ్ బాబు సోషల్ మీడియా ద్వారా రిలీజ్ చేశారు. ఈ సందర్భంగా సినిమా నిర్మాత, ఏషియన్ ఫిల్మ్స్ అధినేత నారాయణ దాస్ నారంగ్ తో పాటు యూనిట్ కు మహేశ్ బాబు శుభాకాంక్షలు తెలిపారు. శేఖర్ కమ్ముల దర్శకత్వం వహిస్తున్న సినిమాకు భాస్కరభట్ల రవికుమార్ పాట రాయడం ఇదే మొదటిసారి. తొలిసారే తనకు అద్భుతమైన పాటను భాస్కరభట్ల ఇచ్చారని అన్నారు.
అదేవిధంగా ఈ పాట విడుదలకు ఒక రోజు ముందే శేఖర్ కమ్ముల రవికుమార్ ను అభినందించారు. శేఖర్ కమ్ముల సినిమాల్లో ఉండే రెయిన్ సాంగ్ కు స్పెషల్ ఉంటుంది. కమర్షియల్ సినిమాల్లో వాన పాటలా కాకుండా హృదయాన్ని తడిపేసేలా శేఖర్ కమ్ముల మూవీలోని పాటలు ఉంటాయన్న విషయం తెలిసిందే. అయితే… ‘ఏవేవో కలలే’ అలాంటి పాట మాత్రమే కాదు… హృదయాన్ని ఉత్తేజ పరిచే చక్కని డాన్స్ కూడా ఉంది. అలాగే సాయిపల్లవి గొప్ప డాన్సర్ కూడా కావడంతో ఈ పాటలో ఆమెతో పోటాపోటీగా నాగచైతన్య కూడా మిరాకిల్ స్టెప్స్ వేసి అదరగొట్టేశాడు. ఓ డాబా మీద వర్షంలో వీళ్ళిద్దరూ వేసిన స్టెప్పులను రేపు వెండితెర మీద చూస్తుంటే ప్రేక్షకుల మతులు పోవడం ఖాయంగా ఉంది. పవన్ సిహెచ్ స్వరాలు అందించిన ఈ పాటను జోనిత గాంధీ, నకుల్ అభయంకర్ పాడారు. శేఖర్ కొరియోగ్రఫీ చేశారు. కాగా ఏప్రిల్ 16న విడుదల కాబోతున్న ‘లవ్ స్టోరీ’పై ఈ పాటతో అంచనాలు మరింత పెరిగాయి.