మా ఎన్నికల బరిలో మంచు విష్ణు…
తెలుగు చలన చిత్ర పరిశ్రమ తరఫున జరిగే మూవీ ఆర్టిస్ట్ అసోసియేషన్(మా) ఎన్నికలు త్వరలోనే ప్రారంభం కానున్న విషయం తెలిసిందే. అయితే ఈ నేపథ్యంలో పోటీదారుల విషయంలో ఈసారి ఆసక్తికరమైన జాబితా వెలుగు చూస్తుంది. ఇప్పటికే ప్రెసిడెంట్ పదవికి ప్రకాశ్రాజ్ బరిలోకి దిగుతున్నట్లు అధికారికంగా ప్రకటించిన విషయం తెలిసిందే.
తాజాగా మా ఎన్నికల బరిలో మంచు వారి అబ్బాయి మంచు విష్ణు పేరు వినబడుతుంది. త్వరలోనే దీనిపై అధికారిక ప్రకటన చేసే అవకాశం ఉన్నట్లు తెలుస్తోంది. కాగా మెగాస్టార్ చిరంజీవిని కలిసి మాట్లాడిన తర్వాతే విష్ణు ప్రకటన చేస్తారని కూడా సమాచారం అందుతుంది. అలాగే మంచు విష్ణు బరిలోకి దిగితే ప్రకాష్ రాజ్ కు మద్దతు ఎలా వుంటుందన్నది కూడా చూడాల్సి ఉంది. కాగా ప్రకాష్ రాజ్ నాన్-లోకల్ కావడంతో ఆవైపుగా మద్దతు వుంటుందా? లేదా? అన్న విషయంపై ఆసక్తికరమైన పరిణామాలు చోటుచేసుకుంటున్నాయి. అయితే ‘తెలుగు సినిమా పరిశ్రమపై తనకు అవగాహన ఉందని.. నటీనటులను ఏకతాటిపై తీసుకొస్తాను’ అంటూ ప్రకాష్ రాజ్ వెల్లడిస్తున్నారు. అంతేకాకుండా మంచు విష్ణుకు సిట్టింగ్ ప్రెసిడెంట్ నరేష్ మద్దతు లభించే అవకాశం మెండుగా ఉన్నట్లు కూడా తెలుస్తోంది. మరి మొత్తానికి ఈసారి మా ఎన్నికలు రసవత్తరంగా మారే అవకాశం కనిపిస్తుంది.