మంత్రి కేటీఆర్ ను కలిసిన సోనూసూద్… !
కరోనా కాలంలో ఎంతో మానవత్వంతో ముందుకు వచ్చి దేశంలోనే ప్రతి ఒక్కరి మనస్సును హత్తుకున్న నటుడు సోనూసూద్. లాక్ డౌన్ ఆపద్బాంధవుడుగా పేరొందిన సోనూసూద్ తన సేవా కార్యక్రమాలతో దేశవ్యాప్తంగా ప్రత్యేక గుర్తింపు తెచ్చుకున్నారు. ఎందరో ప్రముఖుల నుంచి ప్రశంసలు పొందుతున్నాడు. అయితే ఈరోజు తెలంగాణ ఐటీ, పరిశ్రమల శాఖ మంత్రి కేటీఆర్ ను ప్రగతిభవన్ లో కలిసిన సోనూసూద్.. కొంత సేపు చర్చించుకున్నారు. ఇదే సమయంలో సోనూసూద్ నిర్వహిస్తున్న సేవా కార్యక్రమాలను మంత్రి కేటీఆర్ అభినందించారు. దేశవ్యాప్తంగా నలుమూలలనుంచి వస్తున్న విజ్ఞప్తులకు ఎప్పటికప్పుడు స్పందిస్తూ.. సోనూసూద్ పనిచేస్తున్న తీరుపై మంత్రి వివరాలను కూడా అడిగి తెలుసుకోవడం విశేషం.
అదేవిధంగా ప్రస్తుతం దేశవ్యాప్తంగా నెలకొన్న కరోనా సంక్షోభ కాలంలో ఒక ఆశాజ్యోతిగా, వ్యక్తిగత స్థాయిలో ఇంత భారీ ఎత్తున సేవా కార్యక్రమాలు చేయడం గొప్ప విషయమని మంత్రి కేటీఆర్ తెలిపారు. సోనూసూద్ తన సేవా కార్యక్రమాలకు సంబంధించిన వివరాలను, ఈ సేవా రంగంలో తన భవిష్యత్తు ప్రణాళికలను మంత్రి కేటీఆర్ తో పంచుకున్నారు. తన తల్లి స్పూర్తితో తన సేవా కార్యక్రమాలు కొనసాగిస్తున్నట్లు సోనూసూద్ వివరించారు. ఈ సందర్భంగా హైదరాబాద్ పట్ల, ఇక్కడి వారి పట్ల తన అనుబంధాన్ని సోనూసూద్ పంచుకున్నారు. మంత్రి కేటీఆర్ అంటే తనకు ప్రత్యేక గౌరవమని… సోనుసూద్ తెలిపారు. కాగా ఈ సమావేశం తర్వాత మంత్రి కేటీఆర్, సోనూసూద్ కు లంచ్ ఏర్పాటు చేశారు. తర్వాత ఆయన చేస్తున్న సేవ కార్యక్రమాలను అభినందిస్తూ కేటీఆర్ ఆయనను శాలువాతో సత్కరించారు.