‘బాహుబలి: బిఫోర్ ద బిగినింగ్’ కోసం నయనతార…!
ప్రముఖ దర్శకుడు ఎస్ ఎస్ రాజమౌళికి అంతర్జాతీయ గుర్తింపు తెచ్చిపెట్టిన సినిమా బాహుబలి. ఈ సినిమా ఎంతటి ఘనకీర్తిని తెచ్చిపెట్టిందో అందరికీ తెలిసిందే. అయితే నెట్ ఫ్లిక్స్ కోసం ఎస్. ఎస్. రాజమౌళి, ఆర్కా మీడియా సంస్థ సంయుక్తంగా నిర్మిస్తున్న ‘బాహుబలి: బిఫోర్ ద బిగినింగ్’ వెబ్ సీరిస్ కథ మళ్ళీ మొదటికి వచ్చింది. బాలీవుడ్ నటి, ‘తూఫాన్’ ఫేమ్ మృణాల్ ఠాకూర్… శివగామి పాత్రధారిణిగా ఇప్పటికే కొన్ని ఎపిసోడ్స్ ను షూట్ చేశారు. కానీ.. అవి అంతగా ఆశించిన స్థాయిలో రాకపోవడంతో వాటన్నింటినీ పక్కన పెట్టేసినట్లు తెలుస్తోంది. అలాగే మళ్ళీ కొత్తగా డేట్స్ ఇవ్వడానికి మృణాల్ ఠాకూర్ రెడీగా లేకపోవడంతో శివగామి పాత్ర కోసం ఇప్పుడు వామికా గబ్బిని ఎంపిక చేశారు. అలాగే గతంలో తెలుగులో సుధీర్ బాబు ‘భలే మంచి రోజు’తో పాటు, తమిళ అనువాద చిత్రం ‘నన్ను వదిలి నీవు పోలేవులే’ తో తెలుగు వారికి వామికా గబ్బి తెలిసిన అమ్మాయే.
అయితే ఆనంద నీలకంఠన్ నవల ‘ది రైజ్ ఆఫ్ శివగామి, చతురంగ అండ్ క్వీన్ ఆఫ్ మాహిష్మతి’ ఆధారంగా ‘బాహుబలి : బిఫోర్ ద బిగినింగ్’ వెబ్ సీరిస్ ను భారీ బడ్జెట్ తో నిర్మిస్తున్నారు. ఇంతవరకూ షూటింగ్ సన్నివేశాలు అప్ టు ద మార్క్ లేవని భావించిన నెట్ ఫ్లిక్స్ సంస్థ ఇప్పుడు రెట్టింపు బడ్జెట్ ను కేటాయించిందని కూడా తెలుస్తోంది. అందుకే ఈ వెబ్ సీరిస్ కు మరింత క్రేజ్ తీసుకురావడానికి సౌతిండియన్ స్టార్ హీరోయిన్ నయన తారను రంగంలోకి దించుతున్నారని కూడా సమాచారం అందుతుంది. ‘బాహుబలి: బిఫోర్ ద బిగినింగ్’లో నయన్ ఓ కీలక పాత్ర పోషించబోతోందనే ప్రచారం విపరీతంగా సాగుతుంది. ఇదే నిజమైతే నయన్ నటిస్తున్న తొలి వెబ్ సీరిస్ ఇదే. కాగా నయనతార నటించిన ‘అమ్మోరు తల్లి’ అనువాద చిత్రం ఆ మధ్య కరోనా కారణంగా థియేటర్లలో విడుదల కాకుండా డిస్నీ ప్లస్ హాట్ స్టార్ లో స్ట్రీమింగ్ అయిన విషయం తెలిసిందే. కాగా అందులో గ్రామదేవతగా నయనతార చక్కని నటన ప్రదర్శించి విమర్శకుల ప్రశంసలు అందుకుంది. మొత్తానికి నయనతార ‘బాహుబలి’కి ప్రీక్వెల్ అయిన ఈ వెబ్ సీరిస్ లో నటిస్తే… ఇక టాక్ ఆఫ్ ద ఇండస్ట్రీగా మారిపోవడం ఖాయం.