ప్రముఖ నిర్మాతకు జనసేనాని బాధ్యతలు
జనసేన పార్టీ అధినేత పవర్ స్టార్ పవన్ కల్యాణ్ ఓ కీలక నిర్ణయం తీసుకున్నారు. తాజాగా తెలంగాణలోని ఉమ్మడి ఖమ్మం జిల్లా జనసేన పార్టీ ఇంచార్జ్ గా సినీ నిర్మాత, ప్రముఖ వ్యాపారవేత్త, సేవా దృక్పథం కలిగిన రామ్ తాళ్ళూరిని నియమించారు. అయితే రామ్ తాళ్ళూరి గత కొద్దికాలంగా తెలంగాణ రాష్ట్ర నాయకులుగా, జనసేన సోషల్ మీడియా ఇంచార్జ్ గా సేవలు అందిస్తున్నారు.
అదే సమయంలో ఆయనకు ఉమ్మడి ఖమ్మం జిల్లాకు సంబంధించిన అదనపు బాధ్యతలు అప్పగించడం విశేషం. కాగా పవన్ కళ్యాణ్ హీరోగా సురేందర్ రెడ్డి దర్శకత్వంలో రాబోతున్న సినిమాకు రామ్ తాళ్లూరి నిర్మాతగా కూడా వ్యవహరించనున్నారు. అయితే రామ్ తాళ్లూరి సినిమా నిర్మాతగా, వ్యాపారవేత్తగా మంచి పేరుంది. ఆయన గతంలో రవితేజ హీరోగా ‘నేల టికెట్’, ‘డిస్కో రాజా’ సినిమాలను నిర్మించారు. ఆది హీరోగా ‘చుట్టాలబ్బాయి’ సినిమాకు నిర్మాతగా వ్యవహరించారు. చిరంజీవి అల్లుడు కల్యాణ్ దేవ్ హీరోగా ‘కిన్నెర సాని’ సినిమాకు నిర్మాతగా చేయడం విశేషం.