నాంది హిందీ రీమేక్ లో దిల్ రాజు, అజయ్ దేవగన్…
2021 ఫిబ్రవరిలో విడుదలైన అల్లరి నరేశ్ ‘నాంది’ సినిమా మంచి విజయాన్ని అందుకోవడమే కాకుండా విమర్శకుల ప్రశంసలను దక్కించుకున్న విషయం తెలిసిందే. అయితే న్యాయవ్యవస్థలోని లోపాలనే కాకుండా.. ఇండియన్ పీనల్ కోడ్ సెక్షన్ 211 ద్వారా ఎలాంటి న్యాయం పొందవచ్చో కూడా చెప్పిన సినిమా ‘నాంది’. ఇదే ఇప్పుడు అందరినీ ఆకట్టుకుంటుంది. విజయ్ కనకమేడల దర్శకత్వంలో సతీశ్ వేగేశ్న ఈ సినిమాను నిర్మించారు. మూవీ విడుదలైనప్పుడే ఆ యూనిట్ ను ప్రశంసించిన ప్రముఖ నిర్మాత ‘దిల్’ రాజు హిందీ, తమిళ, కన్నడ, మలయాళ రీమేక్ హక్కుల్ని సొంతం చేసుకోవడం విశేషం. మరి తాజాగా ఆయన ఓ హిందీ సినిమాను అజయ్ దేవ్ గన్ తో కలిసి మొదలు పెట్టబోతున్నారు.
అయితే ప్రముఖ హీరో, నిర్మాత దర్శకుడు అజయ్ దేవ్ గన్ కూడా ఈ విషయాన్ని సోషల్ మీడియా ద్వారా వెల్లడించారు. అయితే దిల్ రాజుతో కలిసి హిందీలో ‘నాంది’ని రీమేక్ చేస్తున్నట్టు ఆయన తెలిపారు. ఇందులో నటించే నటీనటులు, సాంకేతిక నిపుణుల వివరాలను మాత్రం ఇంకా వెల్లడించలేదు. కానీ అతి త్వరలోనే అందుకు సంబంధించిన విశేషాలు కూడా పంచుకోనున్నట్లు తెలుస్తోంది. మరో విశేషం ఏమంటే… ‘దిల్’ రాజు ఇప్పటికే బాలీవుడ్ లో బలమైన పునాదిని ఏర్పాటు చేసుకుంటున్నారు. లైక్ మైండెడ్ ప్రొడ్యూసర్స్ తో కలిసి వరుసగా తెలుగు సినిమాలను రీమేక్ చేస్తుండటం తెలిసిందే. కాగా ఇప్పటికే ‘జెర్సీ’ ని హిందీలో రీమేక్ చేస్తున్న ‘దిల్’ రాజు… ‘హిట్’, ‘ఎఫ్ 2’ సినిమాలను కూడా బాలీవుడ్ లో రీమేక్ చేస్తుండటం విశేషం.