తెలంగాణ పటంలో వైఎస్ఆర్ బొమ్మ…..!

తెలంగాణ రాజకీయాల్లో మరో కొత్త పార్టీ ప్రారంభం కానుంది. దివంగత వైఎస్ఆర్ గారాలపట్టి వైఎస్ షర్మిల తెలంగాణలో కొత్త పార్టీని మరో మూడు రోజుల్లో ప్రకటించనున్నారు. అయితే ఇప్పటికే పొలిటికల్ పార్టీ పెట్టడం ఖాయమని స్పష్టం చేసిన వైఎస్ షర్మిల.. అందుకు సంబంధించిన ఏర్పాట్లను కూడా పూర్తి చేసుకున్నారు. అలాగే వైఎస్ షర్మిల ఏర్పాటు చేయనున్న పార్టీ పేరు.. వైఎస్ఆర్ తెలంగాణ పార్టీగా రిజిస్ట్రర్ చేయించారు. తాజాగా పార్టీ జెండా కూడా రెడీ అయినట్లు వెల్లడించారు.
అదేమంటే… వైఎస్ షర్మిల పార్టీ జెండాను తెలంగాణ రాష్ట్ర పక్షి పాలపిట్ట రంగుతో రూపొందించినట్లు తెలుస్తోంది. ముఖ్యంగా జెండాలో 70 శాతం పాలపిట్ట రంగు ఉండగా.. మిగిలిన 30 శాతం నీలం రంగు ఉంది. అంతేకాకుండా పాలపిట్ట రంగు మధ్యలో తెలంగాణ మ్యాప్.. ఆ మ్యాప్లో వైఎస్ రాజశేఖర్ రెడ్డి బొమ్మను ఉంచుతూ జెండాను తయారు చేశారు. వైఎస్ రాజశేఖర్ రెడ్డి జయంతి ఈ నెల 8వ తేదీన.. హైదరాబాద్లోని జేఆర్సీ సెంటర్లో పార్టీ ఆవిర్భావ కార్యక్రమాన్ని నిర్వహించేందుకు ఘనంగా ఏర్పాట్లు చేస్తున్నారు. కాగా సభా వేదికగా జెండా, అజెండా, పార్టీ పేరును అధికారికంగా ప్రకటించనున్నారు వైఎస్ షర్మిల. అలాగే తన పార్టీకి వ్యూహకర్తగా.. ప్రముఖ రాజకీయ వ్యూహకర్త ప్రశాంత్ కిషోర్ శిష్యురాలు ప్రియను నియమించుకున్నారంటూ కొన్ని రోజులుగా పెద్ద ఎత్తున ప్రచారం సాగుతున్న విషయం తెలిసిందే. అయితే తెలంగాణలో రాజన్న రాజ్యం స్థాపనే లక్ష్యంగా వైఎస్ షర్మిల అడుగులు వేస్తున్న విషయం తెలిసిందే.