కళ్యాణ్ రామ్ పాన్ ఇండియా మూవీ డెవిల్….!
టాలీవుడ్ హీరో నందమూరి కళ్యాణ్ రామ్ గత కొంతకాలంగా చాలా కష్టపడుతున్నట్లు తాజాగా ఆయన పుట్టిన రోజును పురస్కరించుకొని రిలీజే చేసిన ఓ ప్రకటన చూస్తే అట్టే అర్థమౌతుంది. ఒకటి కాదు రెండు కాదు మూడు, నాలుగు సినిమాలను కళ్యాణ్ రామ్ క్యూలో పెట్టాడని సమచారం అందుతుంది. అందులో ‘డెవిల్’ వంటి పాన్ ఇండియా మూవీ కూడా ఉండటం విశేషం. ఇంతవరకూ కళ్యాణ్ రామ్ ఈ సినిమాపై ఏమాత్రం పెదవి విప్పలేదు. అయితే ‘బాబు బాగా బిజీ’ ఫేమ్ నవీన్ మేడారం దర్శకత్వంలో అభిషేక్ నామా ‘డెవిల్’ మూవీని నిర్మించబోతున్నారు. తెలుగు, తమిళ, కన్నడ, హిందీ భాషల్లో ఈ సినిమా తెరకెక్కబోతుంది. కళ్యాణ్ రామ్ పుట్టిన రోజు సందర్భంగా విడుదల చేసిన మోషన్ పోస్టర్ టీజర్ ఆద్యంతం ఎంతో ఆకట్టుకునేలా ఉంది. ముఖ్యంగా నేపథ్య సంగీతం అదుర్స్ అనిపించింది. ఇది రెగ్యులర్ కమర్షియల్ మూవీ కాదని, సమ్ థింగ్ స్పెషల్ అని చూస్తే అర్థమైపోతోంది.
అంతేకాకుండా 1945లో మద్రాస్ ప్రెసిడెన్సీ బ్రిటీష్ ఇండియాలోని బ్రిటీష్ సీక్రెట్ ఏజెంట్ కథ ఆధారంగా ఈ సినిమా తెరకెక్కనుంది. బలమైన ప్రేమతో పాటు లోతైన రహస్యాలు అతని జీవితంలో ముడిపడి ఉన్నాయని, చరిత్రలో లిఖించని ఘటనల ఆధారం చేసుకొని చేస్తున్న సినిమా అని దర్శక నిర్మాతలు వెల్లడిస్తున్నారు. కాగా ఇప్పటికే పలు తెలుగు సినిమాలకు సంగీతం అందించి, మంచి గుర్తింపు తెచ్చుకున్న హర్షవర్థన్ రామేశ్వర్ స్వరాలు సమకూర్చుతుండగా, శ్రీకాంత్ విస్సా కథను అందించాడు. కాగా కళ్యాణ్ రామ్ గెటప్ కూడా ఎంతో ఆసక్తికరంగా ఉంది. పంచెకట్టు, మెలితిప్పిన మీసాలు, గుబురు గడ్డం, నల్లటి కోటు, ఓ చేతిలో రివాల్వర్ తో కళ్యాణ్ రామ్ ఆకట్టుకుంటున్నాడు. అలాగే ఫస్ట్ లుక్ పోస్టర్ తోనే ఈ ‘డెవిల్’ నందమూరి అభిమానుల గుండెల్లో చోటు సంపాదించుకుంది. మరి ఈ సినిమా సెట్స్ పైకి ఎప్పుడు వెళుతుంది? తారాగణం ఎవరు? అనే విషయాలను మూవీ యూనిట్ వెల్లడించేంతవరకు ఆగాల్సిందే.