కమల్ హాసన్ ‘విక్రమ్’ కోసం మరో జాతీయ అవార్డు విన్నర్…
విశ్వనటుడు కమల్ హాసన్ నటిస్తున్న తాజా సినిమా ‘విక్రమ్’. తాజాగా ఈ సినిమా కోసం మరో నేషనల్ అవార్డు టెక్నిషియన్ ను రంగంలోకి దింపుతున్నారని తెలుస్తోంది. ఈ విషయాన్ని సినిమా దర్శకుడు లోకేష్ కనగరాజ్ ట్విట్టర్ ద్వారా ప్రకటించారు. జాతీయ అవార్డు గ్రహీత ప్రముఖ సినిమాటోగ్రాఫర్ గిరీష్ గంగాధరన్ ‘విక్రమ్’ కోసం కెమెరాను క్రాంక్ చేయడానికి ముందుకు వచ్చారని ప్రకటించారు. అయితే గిరీష్ గంగాధరన్ ప్రశంసలు పొందిన మలయాళ సినిమాలైన ‘నీలకాశం పచ్చదల్ చువన్నా భూమి’, ‘గుప్పీ’, ‘అంగమలీ డైరీస్’, ‘జల్లికట్టు’ సినిమాలను చిత్రీకరించారు. ఉత్తమ సినిమాటోగ్రఫీకి జాతీయ అవార్డును గెలుచుకున్న గిరీష్ తలపతి విజయ్, ఎఆర్ మురుగదాస్ ల ’సర్కార్’ సినిమాకు కూడా పని చేయడం విశేషం.
అదేవిధంగా ఈ క్రేజీ ప్రాజెక్ట్ లో పలువురు ప్రముఖలు నటించనున్నారు. ఫహద్ ఫాసిల్, అర్జున్ దాస్, విజయ్ సేతుపతి, నరైన్ తదితరులు ఈ జాబితాలో ఉన్నారు. రాక్స్టార్ అనిరుధ్ రవిచందర్ ‘విక్రమ్’ సినిమాకి సంగీతం సమకూర్చుతున్నారు. ఈ సినిమా కోసం నేషనల్ అవార్డు గెలుచుకున్న స్టంట్ కో-ఆర్డినేటర్స్ అన్బరివ్ కూడా ఈ సినిమాలో పని చేసేందుకు రెడీగా ఉన్నారు. కాగా ఇప్పటికే ఈ సనిమాపై భారీ అంచనాలు నెలకొన్నాయనే చెప్పాలి.