ఆలోపే అనిల్ రావిపూడితో మహేష్ సూపర్ ప్లాన్

టాలీవుడ్ సూపర్ స్టార్ మహేష్ బాబుతో అనిల్ రావిపూడి మరోసారి జట్టుకట్టనున్నారు. గత సంవత్సరం సంక్రాంతికి విడుదలైన మహేశ్, అనిల్ రావిపూడి సినిమా ‘సరిలేరు నీకెవ్వరు’ మహేశ్ కెరీర్ లో బిగ్గెస్ట్ హిట్ గా నిలిచిన విషయం తెలిసిందే. అయితే ఇప్పుడు వీరిద్దరి కలయికలో మరో సినిమాకి సన్నాహాలు జరుగుతున్నట్లు తెలుస్తోంది. ప్రస్తుతం మహేశ్ ‘సర్కారు వారి పాట’ షూటింగ్ లో చాలా బిజీగా గడుపుతున్నాడు. అనిల్ రావిపూడి కూడా ‘ఎఫ్3’ షూట్ లో ఉన్నాడు. ఇప్పటికే మహేశ్ రాజమౌళితో సినిమా చేయబోతున్నాడనే వార్తలు గుప్పుమంటున్నాయి. ‘ఆర్ఆర్ఆర్’ తర్వాత వెంటనే వీరి కాంబినేషన్ లో మూవీ ఉంటుందని ఫిల్మ్ సర్కిల్ లో టాక్ నడుస్తోంది. రాజమౌళి ‘ఆర్ఆర్ఆర్’ అక్టోబర్ లో విడుదల కానుంది. ఆ సినిమా తర్వాత కొద్ది కాలం విశ్రాంతి తీసుకుని మహేశ్ సినిమా స్ర్కిప్ట్ పై దృష్టి పెట్టనున్నట్లు తెలుస్తోంది. అయితే ఇదంతా జరగాలంటే ఒక సంవత్సరం పట్టే అవకాశాలు ఉన్నాయని సమాచారం.
ఇదే సమయంలో రాజమౌళి సినిమా కంటే ముందే మరో ప్రాజెక్ట్ ను చేసెయ్యాలనే ధీమాతో ఉన్నారు మహేష్ బాబు. ఇదే అదునుగా భావించి ఈ ఏడాది చివరలో అనిల్ రావిపూడితో సినిమా మొదలెట్టి వచ్చే ఏడాది సమ్మర్ కి విడుదలయ్యేలా ఓ ప్రాజెక్ట్ సెట్ చేస్తున్నారని టాక్ నడుస్తోంది. ఇక అప్పటికి రాజమౌళి కూడా స్క్రిప్ట్ తో రెడీ అయిపోతారని… ఆ వెంటనే రాజమౌళి సినిమా స్టార్ట్ చేయవచ్చనే ఆలోచనలో ఉన్నట్లు తెలుస్తోంది. మరి మహేష్ ఫ్యాన్స్ కి ఇది మంచి గుడ్ న్యూస్ అయినప్పటికీ అనిల్ రావిపూడి అందుకు సిద్ధంగా ఉన్నారా? లేదా? అనేది వేచి చూడాల్సిందే.