ఆగష్టులో అక్షయ్ ‘మిషన్ సిండ్రెల్లా’ వేట మొదలు… !
ప్రస్తుతం బాలీవుడ్ బడా స్టార్స్ అంతా సౌత్ సినిమాలపై కన్నేశారు. తాజాగా అక్షయ్ కుమార్ మరింత జోరు మీదున్నాడు. ఆయన గత సినిమా ‘లక్ష్మీ’. ఆ సినిమా లారెన్స్ తీసిన సౌతిండియన్ బ్లాక్ బస్టర్ ‘కాంచన’ మూవీనే. మరిప్పుడు మరో రెండు కోలీవుడ్ సూపర్ హిట్స్ తో బాలీవుడ్ ప్రేక్షకుల్ని ఎంటర్టైన్ చేయనున్నాడు మన రీమేక్స్ ‘ఖిలాడీ’ అక్షయ్ కుమార్! అయితే ప్రస్తుతం అక్షయ్ చేస్తున్న పలు సినిమాల్లో ‘బచ్చన్ పాండే’ కూడా ఒకటి. కృతీ సనోన్, జాక్విలిన్ ఫెర్నాండెజ్ ఇందులో హీరోయిన్స్ గా నటిస్తున్నారు. ఈ సినిమా తమిళ హిట్ మూవీ ‘జిగర్తాండ’కి హిందీ రీమేక్. అదే తెలుగులో ’గద్దలకొండ గణేశ్’గా రీమేక్ అయిన విషయం తెలిసిందే.
అదేవిధంగా తమిళంలో, ఆ తర్వాత తెలుగులో అలరించిన మరో సినిమా ‘రాట్చసన్’. టాలీవుడ్ లో ‘రాక్షసుడు’గా మంచి టాక్ తెచ్చుకుంది. ఇప్పుడు ఈ కోలీవుడ్ థ్రిల్లర్ మూవీపై అక్షయ్ దృష్టి సారించాడు. ‘మిషన్ సిండ్రెల్లా’ పేరుతో అక్షయ్ కుమార్ రీమేక్ చేయనున్నాడు. మరి ఈ సినిమాలో స్టార్ హీరోయిన్ రకుల్ ప్రీత్ సింగ్ నటించనుంది. ఆమెకి అక్షయ్ కుమార్ తో ఇదే తొలి సినిమా కావడం విశేషం. అంతేకాకుండా ‘మిషన్ సిండ్రెల్లా’ షూటింగ్ ఆగస్ట్ లో మొదలు కానుందని… ముంబైలో టాక్ నడుస్తోంది. కాగా లండన్ లో సినిమాని షూట్ చేస్తారని కూడా సమాచారం. మరి చిన్నపిల్లల్ని కిడ్నాప్ చేసే ఓ సైకో కథే ‘సిండ్రెల్లా’ మూవీ. అక్షయ్ కుమార్ పోలీస్ పాత్రలో మెరవనున్నాడు. మరి అక్షయ్ కు ఈ రెండు సౌత్ రీమేక్స్ ఎలాంటి రుచిని చూపిస్తాయో వేచి చూడాల్సిందే.