అల్లు అర్జున్, ఫహద్ మధ్య పుష్పలో హైవోల్టేజ్ ఫైట్స్..!
టాలీవుడ్ డైరెక్టర్ సుకుమార్ దర్శకత్వంలో ఐకాన్ స్టార్ అల్లు అర్జున్ హీరోగా నటిస్తున్న యాక్షన్ ఎంటర్టైనర్ ‘పుష్ప’. ఈ సినిమాలో రష్మిక మందన్న హీరోయిన్ గా నటిస్తుండగా జగపతి బాబు, ధనంజయ్, ప్రకాష్ రాజ్, హరీష్, వెన్నెల కిషోర్, అనీష్ కురువిల్ల కూడా కీలక పాత్రలను పోషిస్తున్నారు. మైత్రి మూవీ మేకర్స్ నిర్మిస్తున్న ఈ సినిమాలో రష్మిక తొలిసారిగా గిరిజన యువతి పాత్రను పోషిస్తోంది. 2021 మార్చి మూడవ వారంలో ‘పుష్ప’ కోసం మలయాళ సూపర్ స్టార్ ఫహద్ ఫాసిల్ ప్రధాన విరోధిగా మారబోతున్నారని ప్రకటించారు. తాజా సమాచారం ప్రకారం ఫహాద్ ఫాసిల్ ఆగస్టు నెలలో ‘పుష్ప’ సెట్స్ కు వేంచేయనున్నట్లు తెలుస్తోంది.
అదేవిధంగా సుకుమార్ ఇప్పుడు ప్రధాన షెడ్యూల్ కోసం రెడీ అవుతున్నారు. ఈ షెడ్యూల్లో అల్లు అర్జున్… ఫహద్ ఫాసిల్ మధ్య హై వోల్టేజ్ ఫైట్ సీక్వెన్స్ ను ప్లాన్ చేసినట్లు సమాచారం అందుతుంది. ఇందులో ఫహద్ ఫాసిల్ అవినీతి పోలీసుగా నటిస్తున్నట్లు కూడా వార్తలు హల్ చల్ చేస్తున్నాయి. కాగా అంతకుముందు ఓ ఇంటర్వ్యూలో ఫహద్ మాట్లాడుతూ… సుకుమార్ వివరించిన స్క్రిప్ట్ తనకు ఎంతో నచ్చిందని వెల్లడించారు కూడా. అలాగే సుకుమార్ గత సినిమా ‘రంగస్థలం’ తనకు అద్భుతంగా అన్పించిందని కూడా స్పష్టం చేశారు. ఇక ‘పుష్ప’లో తన పాత్ర చాలా ఫ్రెష్ గా ఉంటుందని, ఇంతకు ముందు ఇలాంటిది చేయలేదని కూడా అన్నారు. మొత్తానికి ఆ హై ఓల్టేజ్ యాక్షన్ సీన్ తెరపై ఎలా దుమ్ము రేపనుందో చూసేందుకు ఎంతో ఆసక్తిగా ఎదురు చూస్తున్నారు బన్నీ ఫ్యాన్స్.